ក្រសួងនគរបាលវៀតណាម បានសម្រេចបង្កើនការជួយបណ្តុះបណ្តាលមន្រ្តីនគរបាលជាតិកម្ពុជាតាមរយៈការទទួលទៅសិក្សានៅវៀតណាមឲ្យបានចំនួន ៥២០នាក់ ក្នុងឆ្នាំ២០១៨នេះ។
នេះបើតាមការចុះផ្សាយរបស់អគ្គស្នងការនគរបាលជាតិក្រោយពិធីចុះហត្ថលេខាផែនការសហប្រតិបត្តិការឆ្នាំ២០១៨ រវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រសួងនគរបាល នៃសាធារណរដ្ឋសង្គមនិយមវៀតណាមនាថ្ងៃទី២៨ ខែមករា ឆ្នាំ២០១៨ នៅទីស្តីការក្រសួងមហាផ្ទៃ។
អគ្គស្នងការនគរបាលជាតិបានចុះផ្សាយថាការទទួកមន្រ្តីនគរបាលកម្ពុជាទៅសិក្សានៅប្រទេសវៀតណាម មានចំនួន ៥២០នាក់ ដែលចំនួននេះបានកើនឡើងលើសឆ្នាំមុន ២០នាក់។
ការចុះផ្សាយដដែលបានលើកប្រសាសន៍ អគ្គស្នងការរងនគរបាលជាតិនាយឧត្តមសេនីយ៍ គៀត ច័ន្ទថារិទ្ធ ថា ការទសិក្សានៅវៀតណាមនោះ មានវគ្គរយៈពេលវែងកម្រិតមហាវិទ្យាល័យ និងមធ្យមសិក្សាចំនួន ៨០នាក់ ។
ជាមួយគ្នានេះដែរ ភាគីវៀតណាមក៏នឹងជួយសម្ភារៈបច្ចេកទេស ដល់នគរបាលជាតិកម្ពុជាមួយចំនួន បូករួមទាំងជួយក្នុងការសាងសង់សាលសហសិក្សាមួយសម្រាប់សាលានគរបាលកម្ពុជា និងបន្តជួយពិនិត្យ និងព្យាបាលជំងឺមន្រ្តីជាន់ខ្ពស់កម្ពុជាក្នុងឆ្នាំ២០១៨នេះ ចំនួន ៦០នាក់ ដូចឆ្នាំ២០១៧ ។
ការចុះផ្សាយដដែល នាយឧត្តមសេនីយ៍ គៀត ច័ន្ទថារិទ្ធ បានធ្វើការគូសបញ្ជាក់ថា ក្នុងជំនួបរវាងសម្តេចក្រឡាហោម ស ខេង ជាមួយ ឯកឧត្តម តូ ឡាំ រដ្ឋមន្រ្តីក្រសួងនគរបាលវៀតណាម ភាគីវៀតណាមក៏បានសុំឲ្យអាជ្ញាធរកម្ពុជាអនុវត្តការផ្តល់លិខិតស្នាមស្របច្បាប់ ចំពោះជនអន្តោប្រវេសន៍វៀតណាមឲ្យបានឆាប់ផងដែរ ៕