(ភ្នំពេញ)៖ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន កាលពីថ្ងៃទី ៨ ខែមករា ឆ្នាំ២០១៨ បានជួបពិភាក្សាការងារជាមួយលោកសាស្រ្តាចារ្យ W.Ronnie Coffman និង លោកសាស្រ្តាចារ្យ Max. J. Pfeffer មកពីមហាវិទ្យាល័យវិទ្យាសាស្រ្តជីវិតនិងកសិកម្មនៃសកលវិទ្យាល័យ Cornell សហរដ្ឋអាមេរិច ដើម្បីពិភាក្សាពីកិច្ចសហប្រតិបត្តិការស្រាវជ្រាវដំឡូងមី។ នេះបើយោងតាមការចុះផ្សាយរបស់ក្រសួងកសិកម្មនៅថ្ងៃទី៨ ខែមករា។
ក្រសួងកសិកម្ម បានអោយដឹងថា កិច្ចសហប្រតិបត្តិការស្រាវជ្រាវដំឡូងមី គឺមានឈ្មោះថាគម្រោងពូជដំឡូងមីជំនាន់ក្រោយ ដែលគម្រោងនេះគឺមានគោលបំណងបង្កើនល្បឿននៃការកែលម្អហ្សែនក្នុងការបង្កាត់ពូជដំឡូងមី និងបង្ហាញពីសក្តានុពលដំឡូងមី។
លោករដ្ឋមន្រ្តីក្រសួងកសិកម្ម បានមានប្រសាសន៍ថា កម្ពុជាមានសក្តានុពលក្នុងការដាំដុះដំណាំកសិកម្ម ក្នុងនោះដំឡូងមី ជាផលិតផលកសិកម្មមួយដែលមានសក្តានុពលក្នុងចំណោមផលិតផលសំខាន់ៗនៅកម្ពុជា ហើយបច្ចុប្បន្នកម្ពុជាបានដាំដុះដំណាំដំឡូងមីលើផ្ទៃដីប្រមាណ ៦៧០.០០០ ហិកតា អាចមានលទ្ធភាពផលិតបានប្រមាណ ១៤លានតោនក្នុងមួយឆ្នាំ។
ជាមួយគ្នានេះដែរ ក្រសួងកសិកម្ម មានទស្សនៈវិស័យក្នុងការជំរុញការដាំដុះផលិតផលកសិកម្មដែលជាតម្រូវការទីផ្សារ ដែលមានលក្ខណៈអំណោយផលក្នុងការដាំដុះ មានភាពធន់ទៅនឹងជំងឺនិងការប្រែប្រួលអាកាសធាតុ មានទិន្នផលខ្ពស់ និងចំណូលខ្ពស់ដល់កសិករ។ លោកសាស្រ្តាចារ្យ Ronnie Coffman បានអោយដឹងថា គម្រោងពូជដំឡូងមីជំនាន់ក្រោយនេះបានចាប់ផ្តើមតាំងពីឆ្នាំ ២០១២ នៅក្នុងទ្វីបអាហ្រ្វិក និងត្រូវបានដឹកនាំដោយកម្មវិធីអន្តរជាតិនៅមហាវិទ្យាល័យវិទ្យាសាស្រ្តជីវិតនិងកសិកម្មនៃសកលវិទ្យាល័យ Cornell ដោយសហការជាមួយវិទ្យាស្ថានស្រាវជ្រាវវិទ្យាសាស្រ្តកសិកម្មត្រូពិច និងវិទ្យាស្ថានស្រាវជ្រាវដំណាំស្រូវជាតិនៃប្រទេសនីហេ្សរីយ៉ា។
ដោយឡែកលោកសាស្រ្តាចារ្យ Max. J. Pfeffer បានអោយដឹងដែរថា លោកបានធ្វើការស្រាវជ្រាវនូវប្រភេទពូជដំឡូងមីជំនាន់ថ្មី ដែលមានការធន់ទៅនឹងជំងឺ និងមានផលិតភាពខ្ពស់ ហើយលោកបានធ្វើការដាំសាកល្បងនៅក្នុងទ្វីបអាហ្រ្វិក និងអាមេរិក ដូច្នេះដើម្បីអោយការស្រាវជ្រាវនេះកាន់តែមានប្រសិទ្ធភាព លោកមានបំណងសហការជាមួយក្រសួងកសិកម្ម រុក្ខាប្រមាញ់ និងនេសាទ និងបណ្តាអ្នកស្រាវជ្រាវ ដើម្បីធ្វើការពិសោធន៍សាកល្បង និងដើម្បីស្វែងយល់ពីប្រភេទពូជផ្សេងៗ ព្រមទាំងសិក្សាពីបញ្ហាដែលបានជួបប្រទះលើការដាំដុះដំឡូងមីនៅកម្ពុជា៕