ពលរដ្ឋខ្មែររងគ្រោះចំនួន១៣នាក់ ត្រូវបានជួយអន្តរាគមន៍ពីប្រទេសចំនួន៣ ឲ្យបានត្រឡប់មកកាន់មាតុប្រទេសវិញ។
តាមការចុះផ្សាយរបស់អ្នកនាំពាក្យក្រសួងការបរទេសកម្ពុជាលោក ជុំ សុន្ទរី បានឲ្យដឹងនៅថ្ងៃនេះថា ពលរដ្ឋខ្មែរចំនួន១៣នាក់ ត្រូវបានជួយអន្តរាគមន៍ពីប្រទេសចំនួន៣ គឺម៉ាឡេស៊ី វៀតណាម និងចិន ឲ្យបានត្រឡប់មកកាន់មាតុប្រទេសវិញ។
លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បានឲ្យដឹងថា ពលរដ្ឋខ្មែរទាំង១៣នាក់នោះ មាន៧នាក់ ត្រូវបានស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី សហការជាមួយអាជ្ញាធរម៉ាឡេស៊ី ជួយដោះស្រាយ និងវៀបចំមាតុភូមិនិវត្តពួកគេមកកាន់ប្រទេសកម្ពុជាវិញជាបន្តបន្ទាប់នៅថ្ងៃទី២១ ទី២៥ និងទី២៨ ខែមករា ឆ្នាំ២០១៨ ក្រោយពីពួកគេបានទៅធ្វើការដោយខុសច្បាប់នៅទីនោះ។
ការចុះផ្សាយដដែលស្ថានឯកអគ្គរាជទូតកម្ពុជាប្រចាំប្រទេសវៀតណាម បានសហការជាមួយអាជ្ញាធរវៀតណាម ជួយសង្គ្រោះស្ត្រីខ្មែរ២នាក់ ដែលត្រូវបានមេខ្យល់បោកបញ្ឆោតបម្រុងនាំទៅរៀបការជាមួយបុរសជនជាតិចិន។ ស្ត្រីទាំង២នាក់នេះ មកពីខេត្តកណ្តាល បានធ្វើដំណើរចេញពីភ្នំពេញតាមយន្តហោះទៅដល់ទីក្រុងហាណូយ កាលពីថ្ងៃទី២៦ ខែមករា ឆ្នាំ២០១៨ រួចបន្តដំណើរដោយម៉ូតូឆ្លងកាត់ទីក្រុងហាណូយ ឆ្ពោះទៅព្រំដែនឡាំងសឺនវៀតណាម-ចិន ប៉ុន្តែបានលោតចេញពីម៉ូតូ និងរត់សំដៅទៅការិយាល័យនគរបាលវៀតណាម ដើម្បីសុំកិច្ចអន្តរាគមន៍ហើយ ពួកគេត្រូវបានបញ្ជូនមកកាន់ប្រទេសកម្ពុជាវិញនៅថ្ងៃទី១ ខែកុម្ភៈ នេះ។
ជាមួយគ្នាស្ថានអគ្គកុងស៊ុលកម្ពុជាប្រចាំទីក្រុងហូជីមិញ ប្រទេសវៀតណាម ក៏បានទទួលពលរដ្ឋខ្មែរ៣នាក់ ដែលបានអនុវត្តទោសជាប់ពន្ធនាគាររយៈពេល២ឆ្នាំពីបទ «រៀបចំលេងល្បែងស៊ីសង» និងបានចេញលិខិតធ្វើដំណើរជូនពួកគេត្រឡប់មកកម្ពុជាវិញនៅថ្ងៃទី១៧ ខែមករា ឆ្នាំ២០១៨។
ជាមួយគ្នានោះស្ថានអគ្គកុងស៊ុលកម្ពុជាប្រចាំទីក្រុងសៀងហៃ ប្រទេសចិន ក៏បានជួយសង្គ្រោះស្ត្រីខ្មែរ១នាក់ ដែលត្រូវបានមេខ្យល់នាំទៅរៀបការជាមួយបុរសជនជាតិចិនអំឡុងឆ្នាំ២០១២ ហើយស្ថានអគ្គកុងស៊ុលបានរកឃើញស្ត្រីរងគ្រោះនៅទីក្រុងវ៉េងស៊ូ ខេត្តជឺជាំង និងបានជូននាងមកដល់ស្ថានអគ្គកុងស៊ុលនៅថ្ងៃទី២២ ខែមករា ឆ្នាំ២០១៨ ហើយស្ត្រីរងគ្រោះនឹងត្រឡប់មកកម្ពុជាវិញក្នុងពេលឆាប់ៗនេះ៕