ប្រធានគណបក្សសង្គ្រោះជាតិលោក កឹម សុខា ត្រូវបានសមត្ថកិច្ចដឹកបញ្ជូនមកដល់សាលាឧទ្ធរណ៍ហើយនាព្រឹកព្រលឹមថ្ងៃទី០១ ថ្ងៃកុម្ភៈ ឆ្នាំ២០១៨នេះ ដើម្បីចូលរួមសវនាការលើបណ្តឹងសុំនៅក្រៅឃុំបណ្តោះអាសន្ន។
នាព្រឹកថ្ងៃទី ០១ ខែ កុម្ភៈនេះសាលាឧទ្ធរណ៍បើកសវនាការអសាធារណៈ លើបណ្តឹងសុំនៅក្រៅឃុំបណ្តោះអាសន្នរបស់មេធាវីការពារក្ដីលោក កឹម សុខា ប្រឆាំងនឹងការសម្រេចមិនដោះលែងរបស់ចៅក្រមស៊ើបសួរសាលាដំបូងរាជធានីភ្នំពេញ។
ជាមួយនឹងការនាំខ្លួនលោកកឹម សុខា មកកាន់សាលាឧទ្ធរណ៍ នាព្រឹកនេះ ក៏គេសង្កេតឃើញមានការដាក់របាំងការពារយ៉ាងតឹងរឹង និងមានសមត្ថកិច្ចប្រមូលផ្តុំគ្នាការពារនៅទីនោះផងដែរ ចំណែកផ្លូវជុំវិញ និងក្បែរសាលាឧទ្ធរណ៍ក៏មានការបិទផងដែង ។
កន្លងមកតុលាការតែងតែបានបដិសេធ មិនអនុញ្ញាតឲ្យលោក កឹម សុខា មានវត្តមាននៅក្នុងសវនាការឡើយ ទាំងក្នុងបណ្ដឹងជំទាស់នីតិវិធីនៃការឃុំខ្លួនរបស់សាលាដំបូងរាជធានីភ្នំពេញ និងបណ្ដឹងសុំនៅក្រៅឃុំ បន្ទាប់ពីសមត្ថកិច្ចចាប់ខ្លួន។
លោក កឹម សុខា ត្រូវបានសមត្ថកិច្ចចាប់ខ្លួនកាលពីយប់រំលងអាធ្រាត្រឈានចូល ថ្ងៃទី០៣ ខែកញ្ញា ឆ្នាំ២០១៧ បញ្ជូនទៅឃុំខ្លួននៅពន្ធនាគារត្រពាំងផ្លុង ស្ថិតក្នុងខេត្តត្បូងឃ្មុំ ដោយរងការចោទថាមានទោស «ក្បត់ជាតិ»ឃុបឃិតជាមួយបរទេស ធ្វើបដិវត្តពណ៌ផ្តួលរំលំរដ្ឋាភិបាលកម្ពុជាស្របច្បាប់៕