សាលាដំបូងរាជធានីភ្នំពេញបានកោះហៅជាលើកទី ២ ឲ្យអតីតប្រធានសហជីពសេរីកម្មករលោកជា មុន្នី ចូលខ្លួនបំភ្លឺនៅដើមខែកុម្ភៈ ជំវិញបណ្ដឹងប្ដឹងដោយសហជីពចំនួន១២០ ពីបទញុះញង់។
ក្នុងដីការកោះចុះថ្ងៃទី ២៣ ខែ មករា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក សៀង សុខ បានចេញដីកាកោះជាលើកទី២ កោះហៅឱ្យលោក ជា មុន្នី ចូលបំភ្លឺជូនតុលាការ នៅព្រឹកថ្ងៃទី០៩ ខែកុម្ភៈ ឆ្នាំ២០១៨។
លោកជាមុន្នី ដែលជាអតីតប្រធានសហជីពសេរីកម្មករ និង ជាប្អូនប្រុសបង្កើតរបស់លោក ជា វិជ្ជា ត្រូវបានអយ្យការអមសាលាដំបូងរាជធានីភ្នំពេញ លោក សៀង សុខ ចេញដីកាកោះហៅឲ្យចូលខ្លួនម្ដងរួចហើយកាលពីថ្ងៃទី០៥ ខែមករា ឆ្នាំ២០១៧ ឲ្យចូលបំភ្លឺក្នុងនាមជនសង្ស័យ ប៉ុន្តែលោកជា មុន្នី មិនបានចូលខ្លួននោះទេ។
លោក ជា មុន្នី ត្រូវបានក្រុមសហជីពចំនួន ១២០ ដែលគេមើលឃើញថា មានទំនោរគាំទ្ររដ្ឋាភិបាលដាក់ពាក្យបណ្ដឹងប្តឹងទៅតុលាការ ដោយចោទពីបទញុះញង់ បន្ទាប់ពីលោក បានធ្វើបទសម្ភាសន៍មួយជាមួយវិទ្យុអាស៊ីសេរីកាលពីចុងឆ្នាំ២០១៧ ដែលសហជីពទាំងនោះថា លោកជា មុន្នី បានអំពាវនាវឲ្យសហគមន៍អឺរ៉ុប និងសហរដ្ឋអាមេរិកដាក់ទណ្ឌកម្មលើរដ្ឋាភិបាលកម្ពុជាក្រោយរំលាយបក្សប្រឆាំង។
ក្រោយតុលាការចេញដីកាកោះអង្គការឃ្លាំមើលសិទ្ធិមនុស្សអន្តរជាតិ Front Line Defenders បានចេញសេចក្ដីថ្លែងការណ៍មួយកាលពីថ្ងៃទី ១៦ ខែមករា ជំរុញឲ្យតុលាការទម្លា្កក់បទចោទលើអតីតប្រធានសហជីពលោក ជា មុន្នី និង ស្នើឲ្យអាជ្ញាធរធានាសុវត្ថិភាព និង ស៊ើបអង្កេតឲ្យបានត្រឹមត្រូវលើករណីគម្រាមសម្លាប់ និងការធ្វើទុក្ខបុកម្នេញលើលោកជាមន្នីផងដែរ៕