សីតណ្ហភាពនៅកម្ពុជានឹងចុះត្រជាក់ជាលើកទី ៤ ធ្លាក់ដល់ ១៣ ទៅ ១៤ អង្សានៅចុងសប្ដាហ៍នេះ។
តាមការចុះផ្សាយនៅថ្ងៃទី ០១ ខែ កុម្ភៈ របស់ក្រសួងធនធានទឹក និង ឧតុនិយមបានឲ្យដឹងថាបន្ទាប់ពីធ្វើការព្យាករណ៍ស្ថានភាពអាកាសធាតុឃើញថាជ្រលងសម្ពាធខ្ពស់ពីប្រទេសចិន និង ខ្យល់មូសុងឦសានបានកំពុងបង្កើនឥទ្ធិពលគ្រប់ដណ្ដប់លើភាគខាងជើងនៃកម្ពុជា ដែលបណ្ដលឲ្យសីតណ្ហភាពចុះត្រជាក់ជាលើកទី ៤ ចាប់ពីថ្ងៃទី ៤ ដល់ទី ៩ ខែកុម្ភៈនេះ។
ក្រសួងធនធានទឹក និង ឧតុនិយមបានឲ្យដឹងថាតំបន់ខ្លះអាចនឹងចុះត្រជាក់ដល់ ១៣ ទៅ ១៤ អង្សា ដូចជាតំបន់ជួរភ្នំដងរែក។ ចំណែកឯខែឧត្តមមានជ័យ បៃលិន ព្រះវិហារ មណ្ឌលគិរី រតនគិរី ស្ទឹងត្រែង ចុះត្រជាក់ត្រឹម ១៥ ទៅ ១៦ អង្សា។
ខេត្តមួយចំនួនទៀត ចុះដល់ ១៧ ទៅ ១៨ អង្សា ដែលមានដូចជា សៀមរាប ពោធិ៍សាត់ បាត់ដំបង បន្ទាយមានជ័យ កំពង់ធំ កំពង់ចាម ក្រចេះ ត្បូងឃ្មុំ និងកោះកុង ចំណែកឯភ្នំពេញ និង ខេត្តមួយចំនួនទៀតដូចជាកំពង់ឆ្នាំ កំពង់ស្ពឺ តាកែវ កណ្ដាល ស្វាយរៀង ព្រៃវែងសីតណ្ហភាពចុះត្រឹម ១៩ ទៅ ២០ អង្សា។
ចំពោះខេត្តកែប កំពត និង ព្រះសីហនុ មានសីតណ្ហភាពរហូតដល់ទៅ ២៣ ទៅ ២៤ អង្សា៕