ក្រសួងមហាផ្ទៃថាករណីបទល្មើសគ្រឿងដែលបង្ក្រាបបានក្នុងឆ្នាំ ២០១៧ មានការកើនឡើងជាង ៩២ភាគរយ បើប្រៀបធៀបនឹងឆ្នាំ ២០១៦។
ការលើកឡើងបែបនេះនៅទីស្តីការក្រសួងមហាផ្ទៃ នាព្រឹកថ្ងៃទី៥ ខែកុម្ភៈ ឆ្នាំ២០១៨នេះក្នុងសន្និបាតបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ២០១៧ និងទិសដៅការងារឆ្នាំ២០១៨ និងកិច្ចប្រជុំបូកសរុបលទ្ធផលនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ ឆ្នាំ២០១៧។នេះបើតាមការចុះផ្សាយរបស់អគ្គស្នងការនគរបាលជាតិ។
ការចុះផ្សាយនោះបានលើកយកប្រសាសន៍របស់នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន ថាកាលពីឆ្នំា២០១៧ កន្លងទៅ បទល្មើសគ្រឿងញៀនបង្រ្កាបបាន ៨ ១៧៣ ករណី ហើយចំនួននេះកើនឡើង ៩២,៤៨ភាគរយ បើប្រៀបធៀបឆ្នាំ២០១៦ ដែលអាជ្ញាធរបង្ក្រាបបានត្រឹមតែ ៤ ២៤៦ ករណី ប៉ុនណោះ។
ការចុះផ្សាយដដែលបន្តថាការបង្ក្រាបបទល្មើសនោះឃាត់ខ្លួនបាន ជនសង្ស័យចំនួន ១៧ ៧៩៥នាក់ ចំនួននេះ កើនឡើង ៧ ៨៦២នាក់ បើធៀបនឹងឆ្នាំ២០១៦ ហើយរឹបអូសគ្រឿងញៀនជិត ៣០០គីឡូក្រាម ។
ការចុះផ្សាយនោះបន្ថែមថា សម្រាប់ឆ្នាំ២០១៧នេះ ក្រុមការងារបានបន្សាបគ្រឿងញៀន ដល់អ្នកញៀនគ្រឿងញៀនបានប្រមាណជាង ១០ ០០០នាក់ ហើយបានបញ្ជូនឲ្យត្រឡប់ទៅផ្ទះរបស់ពួកគេវិញចំនួនជាង ៨០០០នាក់ ប៉ុន្តែក្នុងចំណោមនោះមាន ចំនួយជាង ១០០០នាក់បានត្រឡប់ទៅរកការប្រើប្រាស់គ្រឿងញឿនវិញ ។
ការចុះផ្សាយដដែលនោះក៏បានលើកឡើងដែរថានាយឧត្តមសេនីយ៍ កែ គឹមយ៉ាន ជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានជម្រុញដល់មន្រ្តីពាក់ព័ន្ធទាំងអស់ឲ្យបង្កើនការទប់ស្កាត់ការនាំចូលគ្រឿងញៀនពីច្រកព្រំដែនឡាវ ខណៈការនាំចូលគ្រឿងញៀនពីតំបន់ភាគឦសាន្តនេះ នៅតែមានកម្រិតខ្ពស់ជាងតំបន់ផ្សេងៗទៀតនោះ៕