កញ្ចប់ថវិកា១៥០លានដុល្លារគ្រោងផ្ដល់ជូនសហគ្រាសខ្នាតតូចនិងមធ្យមដើម្បីពង្រីកអាជីវកម្ម

ដោយ៖

២០១៨/០៩/២០ at ៩:១៨ AM

ភ្នំពេញ ៖ ខណៈពេលដែលវិស័យសហគ្រាសខ្នាតតូច និងមធ្យម ( SME ) កម្ពុជានៅតែជួបបញ្ហាទុនសម្រាប់ពង្រីកអាជីវកម្ម ហើយបណ្ដាធនាគារនិងមីក្រូហិរញ្ញវត្ថុដែលកំពុងធ្វើប្រតិបត្តិការនៅក្នុងប្រទេសកម្ពុជា ក៏ពុំទាន់ផ្ដល់កម្ចីទូលំទូលាយសម្រាប់សហគ្រិន ពេលនេះកញ្ចប់ថវិកាចំនួន ១៥០លានដុល្លារអាមេរិកត្រូវបានធនាគារធំមួយក្នុងស្រុកប្រកាសផ្ដល់ជូនសហគ្រិនក្នុងវិស័យ SME កម្ពុជា ដើម្បីយកទៅពង្រីកអាជីវកម្ម ។
ថ្លែងនៅក្នុងពីប្រកាសផ្ដល់កញ្ចប់១៥០លានដុល្លារកាលពីថ្ងៃទី១៨ កញ្ញា នេះ អ្នកឧកញ៉ា ពុង ឃាវសែ ពាណិជ្ជករដែលផ្ដល់កញ្ចប់ថវិកានេះបានមានប្រសាសន៍ថា កន្លងមកបានសង្កេតឃើញថា សហគ្រាសធុនតូច និងមធ្យមកម្ពុជា មិនត្រូវបានគេមើលឃើញទេ ជាក់ស្ដែងធនាគារធំៗមកពីក្រៅប្រទេស និងធនាគារ ក្នុងស្រុកហាក់មើលរំលងពីវិស័យ SMEs ។ ដោយមើលឃើញពីភាពលំបាកក្នុងការស្វែងរកទុននេះ ទើបក្នុងនាមជាវិនិយោគិនក្នុងស្រុក និងជាធនាគារធំមួយក្នុងស្រុក កាណាឌីយ៉ា បានសម្រេចបង្កើតទុន១៥០លានដុល្លារផ្ដល់ជូនទៅ SMEs ក្នុងប្រទេស ដើម្បីប្រើប្រាស់ពង្រីកអាជីវកម្ម សម្រាប់ប្រកួតប្រជែងជាមួយប្រទេសក្នុងតំបន់អាស៊ាន ។

អ្នកឧកញ៉ាបន្តថា ទុនពង្រីកអាជីវកម្មរបស់ SMEs គឺជាកត្តាសំខាន់ណាស់ ហើយក្រៅពីធនធានមនុស្ស បច្ចេកទេស និងហេដ្ឋារចនាសម្ព័ន្ធ ក្នុងខ្សែចង្វាក់ផលិតកម្ម ក៏ទាមទារអោយមានទុនដែរ ដូចនេះហើយ បើចង់អោយ SMEs ក្នុងប្រទេសកម្ពុជា រីកចម្រើន និងអាចប្រកួតប្រជែងជាមួយប្រទេសជិតខាងបាន ត្រូវមានការចូលរួមពីគ្រប់ភាគីជាក់ស្ដែងបណ្ដាធនាគារ នានា ដែលមានប្រភពទុនគ្រប់គ្រាន់ជាដើម ។
នាយកប្រតិបត្តិធនាគារកាណាឌីយ៉ា លោក Raymond Sia Say Guan បានអោយដឹងថា ទុន១៥០លានដុល្លារអាមេរិកនេះ មិនមែនជាទុនមកពីខាងណាទេ គឺជាទុនរបស់ធនាគារក្នុងស្រុកនេះទាំងស្រុង ហើយលក្ខខណ្ឌមិនមានអ្វីដែលពិបាកសម្រាប់សហគ្រិនក្នុងវិស័យ SMEs នោះដែរ អោយតែពួកគាត់មានអាកម្មត្រឹមត្រូវ ហើយខ្វះខាតទុនពិតប្រាកដ។ លោកនិយាយថា៖« យើងអាចផ្ដល់ទុនដល់ម្ចាស់អាជីវកម្ម មិនកំណត់ចំនួនទឹកប្រាក់កម្ចីនោះទេ ហើយអ្វីដែលពិសេសនោះ គឺយើងនឹងយកការប្រាក់ពីអតិថិជន ក្នុងវិស័យ SMEs ទាបជាងការប្រាក់ចំពោះទូទៅ ព្រោះយើងចង់អោយមានការអភិវឌ្ឍន៍ វិស័យ SMEs នៅក្នុងប្រទេសកម្ពុជា »។

លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានមានប្រសាសន៍ថា កញ្ចប់ថវិកា ១៥០លានដុល្លារនេះ គឺជារឿងដ៏ល្អណាស់ សម្រាប់វិស័យ SMEs ក្នុងប្រទេសកម្ពុជា ក្នុងការពង្រីកអាជីវកម្មរបស់ពួកគេ ។ លោកថា៖« សព្វថ្ងៃនេះ SMEs ក្នុងប្រទេសកម្ពុជាមានរហូតដល់ជិត៩០ម៉ឺនទៅហើយ ហើយនេះជាតួលេខត្រូសៗប៉ុណ្ណោះ ដូចនេះ យើងនឹងរង់ចំាំមើល ពេលក្រសួងផែនការធ្វើស្ថិតិរួចរាល់ ព្រោះ SMEs ក្នុងប្រទេសកម្ពុជា នៅមានមួយចំនួន មិនទាន់បានចុះបញ្ជីត្រឹមត្រូវ »។

លោកបន្តថា កាលពីមុនសហគ្រាសក្នុងប្រទេសកម្ពុជា មិនពិបាករកប្រាក់ចំណេញនោះទេ ព្រោះកាលនោះ ទំនិញ ពីក្រៅប្រទេសចូលមកក្នុងប្រទេសកម្ពុជា ត្រូវការបង់ពន្ធគយខ្ពស់ ដូចនេះរាល់ទំនិញក្រៅប្រទេស ត្រូវតែលក់ថ្លៃជាងទំនិញក្នុងស្រុក ក៏ប៉ុន្តែនៅពេលដែលកម្ពុជា បានចូលក្នុងសមាហរណកម្មសេដ្ឋកិច្ចអាស៊ាន នៅថ្ងៃខាងមុខរាល់ទំនិញទាំងឡាយពីក្រៅប្រទេស នឹងត្រូវរួចពន្ធគយ ។ លោកថា៖« ដើម្បីអោយ SMEs ក្នុងប្រទេសយើង រស់រាន និងប្រកួតប្រជែងជាមួយបណ្ដាប្រទេសក្នុងតំបន់អាស៊ាន យើងត្រូវការរៀនសូត្រពីប្រទេសរីកចម្រើន ដូចជាប្រទេសកូរ៉េ ជប៉ុន ជាដើម »៕

ព័ត៌មានផ្សេងទៀត