លោក កឹម សុខា ត្រូវបានស្រង់សំដីថាប្រធានអតីតគណបក្សសង្គ្រោះជាតិរូបនេះបញ្ជាក់ជំហរ មិនចូលរួមជាមួយចលនាសង្គ្រោះជាតិនោះទេ។
ចលនាសង្គ្រោះជាតិថ្មីនេះត្រូវបានប្រកាសបង្កើតឡើងដោយលោក សម រង្ស៊ី អតីតប្រធានគណបក្សសង្គ្រោះជាតិ កាលពីថ្ងៃទី ១២ ខែ មករា ដើម្បីគៀងគរឲ្យមានចលនាមួយដែលមានការចូលរួមពីគ្រប់មជ្ឈដ្ឋាន ក្នុងការដាក់សម្ពាធលើរដ្ឋាភិបាលកម្ពុជា និងឈានទៅរកការដឹកនាំប្រទេសនាពេលខាងមុខ។
ការបង្កើតចលនាសង្គ្រោះជាតិថ្មីនេះឡើងបន្ទាប់ពីគណបក្ស CNRP ត្រូវបានរំលាយ ហើយមន្ត្រីជាន់ខ្ពស់ ១១៨នាក់ត្រូវបានហាមឃាត់មិនឲ្យធ្វើសិទ្ធិនយោបាយរយៈពេល ៥ឆ្នាំ។
ដោយឡែកក្រោយបង្កើតចលនានេះមានមន្ត្រី និង សកម្មជន អតីតបក្សសង្គ្រោះជាតិមួយចំនួនបដិសេធមិនចូលរួម ជាមួយគ្នានោះលោកកឹមសុខា ក៏បញ្ជាក់ជំហរយ៉ាងច្បាស់ថា មិនចូលរួមជាមួយចលនាបង្កើតថ្មី និងមិនគាំទ្រចលនាថ្មីនេះទេ។
លោក កឹម សុខា ត្រូវបានលោក មុត ចន្ថា ផ្សព្វផ្សាយលើទំព័រហ្វេសប៊ុកថា៖ «ឯកឧត្តម កឹម សុខា ប្រធានគណបក្សសង្គ្រោះជាតិ មានប្រសាសន៍បញ្ជាក់ជំហរយ៉ាងច្បាស់ថា មិនចូលរួមជាមួយចលនាបង្កើតថ្មី និងមិនគាំទ្រចលនាថ្មីនេះ”។
លោក មុត ចន្ថា បានសរសេរបន្ថែមថា លោក កឹម សុខា បន្តនៅជាមួយឆន្ទៈរបស់ប្រជាពលរដ្ឋខ្មែរជាង ៣លាននាក់ដែលបានបោះឆ្នោតឲ្យគណបក្សសង្គ្រោះជាតិកាលពីឆ្នាំ ២០១៣។
គួរបញ្ជាក់ថាលោក សម រង្ស៊ី និងលោក កឹម សុខា បានបង្កើតគណបក្សសង្គ្រោះជាតិ (CNRP) រួមគ្នាកាលពីអំឡុងឆ្នាំ២០១២ ហើយគណបក្សប្រឆាំងដ៏ធំមួយនេះ ត្រូវបានរំលាយដោយអំណាចសាលដីកាតុលាការកំពូលកាលពីថ្ងៃទី១៦ ខែវិច្ឆិកា បន្ទាប់ពីលោក កឹម សុខា ត្រូវបានចាប់ខ្លួនកាលពីរំលងអធ្រាត្រឈានចូលថ្ងៃទី ០៣ ខែសីហា ដោយរងការចោទថា «ក្បត់ជាតិ»៕