(ភ្នំពេញ)៖ ឆ្នាំ២០១៧នេះ គឺជាឆ្នាំនៃទំនាក់ទំនងដ៏មានផ្លែផ្កាល្អដែលបានធ្វើអោយទំនាក់ទំនងរវាងជប៉ុន និងកម្ពុជា គឺមានការវិឌ្ឍន៍ លើគ្រប់វិស័យ ហើយជប៉ុននឹងបន្តគាំទ្រដល់ការខិតខំប្រឹងប្រែងរបស់កម្ពុជាក្នុងការអភិវឌ្ឍដោយផ្អែកលើគោលនយោបាយសហប្រតិបត្តិការអភិវឌ្ឍន៍ថ្មីសម្រាប់កម្ពុជាដែលទើបតែបានរៀបចំឡើង៕ នេះបើយោងតាមលិខិតរបស់លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជា ក្នុងឱកាសចម្រើនព្រះជន្ម ព្រះករុណា ព្រះចៅអធិរាជប៉ុន ថ្ងៃទី២១ ខែធ្នូ ឆ្នាំ២០១៧។
លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជា បានបញ្ជាក់ថា ទំនាក់ទំនងប្រកបដោយផ្លែផ្ការវាងប្រទេសទាំងពីរនេះ គឺបញ្ជាក់តាមរយៈដំណើរទស្សនកិច្ចរបស់សម្តេច ហ៊ុន សែន នាយករដ្ឋមន្រ្តី ហ៊ុន សែន នៅកាន់ប្រទេសជប៉ុនកាលពីខែសីហាកន្លងទៅនេះ។ ក្នុងនោះនាយករដ្ឋមន្រ្តីជប៉ុន និង នាយករដ្ឋមន្រ្តីកម្ពុជា បានបង្ហាញការសាទរដល់ខួប២៥ឆ្នាំនៃការអនុម័តច្បាប់ប្រតិបត្តិការថែរក្សាសន្តិភាពអង្គការសហប្រជាជាតិរបស់ជប៉ុនដែលជាចំណុចចាប់ផ្តើមក្នុងការចូលរួមចំណែកថែរក្សាសន្តិភាពរបស់ជប៉ុន ហើយសកម្មភាពជាក់ស្តែងបានចាប់ផ្តើមនៅប្រទេសកម្ពុជា។
ជាមួយគ្នានេះដែរ ថ្នាក់ដឹកនាំទាំងពីររូប ក៏បានស្វាគមន៍ចំពោះដំណើរការវិវឌ្ឍនៃភាពជាដៃគូយុទ្ធសាស្រ្ត រវាងប្រទេសទាំងពីរ និងឯកភាពគ្នាថាពង្រឹងកិច្ចសហប្រតិបត្តិការចំពោះបញ្ហាទ្វេភាគី ក្នុងតំបន់ និងអន្តរជាតិ។
ត្រង់ចំណុចនេះ លោក ហូរីណូអ៊ុជិ ហ៊ីដេហ៊ីសា សង្ឍឹមថាចលនានៃការអភិវឌ្ឍក្នុងពេលបច្ចុប្បន្ននេះ នឹងបន្តទៅមុខទៀតក្នុងឆ្នាំ២០១៨ ដែល ជាខួបអនុស្សាវរីយ៍៦៥ឆ្នាំនៃការបង្កើតទំនាក់ទំនងការទូតរវាងប្រទេសយើងទាំងពីរ៕