លោកសុខ ឥសាន អ្នកនាំពាក្យគណបក្សប្រជាជនកម្ពុជា បញ្ជាក់ថា កិច្ចការពារឯករាជ្យភាព អធិបតេយ្យភាព
ជាតិ និងបូរណភាពទឹកដី គឺជាតួនាទី ភារកិច្ចរបស់រដ្ឋាភិបាលកម្ពុជាដែល មានចែងក្នុងរដ្ឋធម្មនុញ្ញ។លោកថា ការបោះបង្គោលខ័ណ្ឌសីមាព្រំដែនជាមួយប្រទេសជិតខាង រួមមានសាធារណរដ្ឋសង្គមនិយមវៀតណាម សាធារណរដ្ឋប្រជាធិបតេយ្យប្រជាមានិតឡាវ និង ព្រះរាជាណាចក្រថៃ គឺជាការបំពេញ ភារកិច្ច និងកាតព្វកិច្ច ដើម្បីបម្រើបុព្វហេតុ និងផលប្រយោជន៍ជាតិ និងប្រជាជនកម្ពុជា ក្នុងគោលបំណងកសាងព្រំដែនជាព្រំដែនសន្តិភាព មិត្តភាព និងសហប្រតិបត្តិការយូរអង្វែង និងប្រែក្លាយតំបន់ព្រំដែនឲ្យទៅជាតំបន់អភិវឌ្ឈន៍ កែប្រែលើកកម្ពស់ជីវភាពរស់នៅរបស់ប្រជាជន តែវាមិនមែន ដើម្បីប្រជាប្រិយភាពសម្រាប់ការបោះឆ្នោតរបស់គណបក្សប្រជាជនកម្ពុជា និងរដ្ឋាភិបាលកម្ពុជានោះទេ។
ដូច្នេះ ការចោទប្រកាន់ថា ការដោះស្រាយបញ្ហាព្រំដែនជាមួយប្រទេសជិតខាងកម្ពុជា ជាពិសេសការដោះស្រាយបញ្ហាព្រំដែនជាមួយឡាវកន្លងទៅថ្មីៗនេះ គឺដើម្បីតែប្រជាប្រិយភាពសម្រាប់ការបោះឆ្នោតរបស់គណបក្សប្រជាជនកម្ពុជា និង រដ្ឋាភិបាលកម្ពុជា គឺជាការមិនត្រឹមត្រូវទាល់តែសោះ។
ប៉ុន្តែ លោកថា ការទទួលខុសត្រូវលើបញ្ហាបូរណភាពទឹកដីនេះ បានក្លាយជាគុណសម្បត្តិ របស់ រដ្ឋាភិបាលកម្ពុជា របស់គណបក្សប្រជាជនកម្ពុជា រហូតទទួលបានការគាំទ្រ យ៉ាងពេញទំហឹង ដែលធ្វើឲ្យគណបក្សប្រជាជនកម្ពុជា នៅតែរក្សាបាននូវឧត្តមភាព និងសក្តានុពលយកឈ្នះនៅគ្រប់ការបោះឆ្នោត។
ជាការកត់សម្គាល់ ទំនាស់ព្រំដែន ជាមួយប្រទេសឡាវកន្លងទៅ គេឃើញសន្ទុះនៃដំណោះស្រាយ បានទាន់ពេលវេលា ឯជាមួយប្រទេសថៃកន្លងមក បើទោះជាមកដល់ពេលនេះ មិនទាន់បានចប់សព្វគ្រប់ ក៏រដ្ឋាភិបាល ហាក់មិនមានភាពព្រងើយកន្តើយឡើយ។ប៉ុន្តែបញ្ហាព្រំដែនដដែលនេះជាមួយប្រទេសវៀតណាម បានអូសបន្លាយ ជាច្រើនទសវត្សមកហើយ ដែលមកដល់ពេលនេះ នៅមិនទាន់ចប់សព្វគ្រប់នៅឡើយទេ។
នៅឯកិច្ចប្រជុំ APEC ក្នុងប្រទេសវៀតណាម ម្សិលមិញ លោកនាយករដ្ឋមន្ត្រីហ៊ុន សែន និងលោកង្វៀន ស៊ុកហ្វុក នាយករដ្ឋមន្ត្រីវៀតណាម ក៏បានមូលមាត់គ្នា នៅឯកិច្ចសន្ទនាក្រៅផ្លូវកា ថា នឹងជំរុញគណៈកម្មាធិការព្រំដែន នៃប្រទេសទាំងពីរ ពន្លឿនការបោះបង្គោលព្រំដែនគោក ឲ្យបានរួចរាល់នៅឆ្នាំ២០១៨ ព្រមទាំងនឹងបន្តប្រឹងប្រែង កសាងព្រំដែនរួមគ្នាមួយ ដែលមានសុខសន្តិភាព ស្ថេរភាព អភិវឌ្ឍន៍ ផ្លាស់ប្តូរទំនិញ ពាណិជ្ជកម្ម និងទេសចរណ៍បន្ថែមទៀត៕