(ភ្នំពេញ)៖ រដ្ឋាភិបាលចិនបានត្រៀមកញ្ចប់ថវិកាសរុបចំនួន ១,៨០០លានយ័ន ប្រមាណ២៧៦លានដុល្លារសហរដ្ឋអាមេរិក សម្រាប់គម្រោងតូច-ធំ នៅកម្ពុជា។ គម្រោងនេះត្រូវបានលើកឡើងក្នុងជំនួបរវាងសម្តេច ហ៊ុន សែន នាយករដ្ឋមន្រ្តីកម្ពុជា និងនាយករដ្ឋមន្រ្តីចិន លោក លី ខឺឈាង នៅព្រឹកថ្ងៃទី១១ ខែមករានេះ។ នេះបើយោងតាមបណ្តាញទំនាក់ទំនងសង្គមហ្វេសប៊ុករបស់សម្តេចនៅថ្ងៃនេះ។
កញ្ចប់ថវិកាសរុបចំនួន ១,៨០០លានយ័ននេះរួមមាន៖ មូលនិធិឥតសំណង ១,២០០លានយ័ន សម្រាប់គម្រោងអភិវឌ្ឍខ្នាតតូច និងមូលនិធិប្រមាណ ៦០០លានយ័នថែមទៀត សម្រាប់គម្រោងអភិវឌ្ឍន៍ធំៗ ដូចជាផ្លូវល្បឿនលឿនជាដើម។
ជាការឆ្លើយតប សម្តេច ហ៊ុន សែន នាយករដ្ឋមន្រ្តីកម្ពុជា បានស្វាគមន៍យ៉ាងខ្លាំងចំពោះកញ្ចប់ថវិកាដែលរដ្ឋាភិបាលចិនត្រៀមសម្រាប់គម្រោងតូច-ធំ នៅកម្ពុជានេះ៕