ក្រសួងកសិកម្មរុក្ខាប្រមាញ់ និង នេសាទឲ្យស្ថាប័នក្រោមឱវាទជំរុញបង្កើននូវផលិតកម្មស្វាយចន្ទី ដើម្បីនាំចេញទៅលក់នៅក្រៅប្រទេស ឲ្យសមស្របទៅនឹងកំណើនតម្រូវការទីផ្សារនៃផលិតផលដំណាំនេះ។
ក្រសួងកសិកម្មបានចេញសេចក្ដីណែនាំមួយចុះថ្ងៃទី ២៥ ខែ មករាម្សិលមិញស្ដីពីការជំរុញនូវផលិតកម្មស្វាយចន្ទីសម្រាប់បម្រើឲ្យការនាំចេញឲ្យសមស្របទៅនឹងកំណើនតម្រូវការទីផ្សារនៃផលិតផលដំណាំស្វាយចន្ទីនេះ។
ក្រសួងកសិកម្មបានឲ្យដឹងថាថ្មីៗនេះ សមាគមស្វាយចន្ទីវៀតណាមបានយល់ព្រម ផ្ដល់នូវពូជស្វាយចន្ទី គាំទ្របច្ចេកទេស និង ប្រមូលទិញទិន្នផលស្វាយចន្ទីពីកសិករ ឬសហគមន័កសិកម្ម ដោយអនុវត្តតាមគោលការណ៍ផលិតកម្មកសិកម្មតាមកិច្ចសន្យា។
ក្រសួងកសិកម្មបានបន្តថា ដើម្បីបង្កើនផលិតកម្មដំណាំស្វាយចន្ទីឲ្យមានប្រសិទ្ធភាព ក្រសួងណែនាំឲ្យអង្គភាពជំនាញពាក់ព័ន្ធ ពិនិត្យសិក្សាលើសក្តានុពលជាយុទ្ធសាស្រ្ត និងកំណត់តំបន់ដាំដុះសម្រាប់កសិករ និងសហគមន៍កសិកម្ម ធ្វើការផលិត និង ភ្ជាប់ទីផ្សារតាមរយៈការអនុវត្តអនុស្សរណៈយោគយល់គ្នា ស្ដីពីការជំរុញផលិតកម្មស្វាយចន្ទីកម្ពុជាសម្រាប់នាំចេញ ជាមួយសមាគមស្វាយចន្ទីវៀតណាម។
ជាមួយគ្នានោះក្រសួងកសិកម្មក៏បានណែនាំឲ្យសម្របសម្រួល និង សហការឲ្យបានជិតស្និទ្ធជាមួយសមាគមស្វាយចន្ទីវៀតណាម ដើម្បីជ្រើសរើសក្រុមផលិត និង ផ្ដល់បច្ចេកទេសទំនើបក្នុងការដាំជំនួសនូវប្រភេទពូជថ្មីដែលផ្ដល់ទិន្នផលខ្ពស់។
បន្ថែមលើនោះក្រសួងកសិកម្មក៏ជំរុញឲ្យមានការផ្សព្វផ្សាយឲ្យបានទូលំទូលាយដល់ប្រជាកសិករ និង សហគមន៍កសិកម្ម ព្រមទាំងក្រុមហ៊ុន ដីសម្បទានសេដ្ឋកិច្ច ឲ្យចូលរួមបង្កើនទិន្នផលស្វាយចន្ទីជាមួយសមាគមស្វាយចន្ទីវៀតណាម ដើម្បីភ្ចាប់ទំនាក់ទំនងទីផ្សារនាំចេញឲ្យកាន់តែប្រសើរផងដែរ៕