ត្រសក់រាប់តោននៅបាត់ដំបងត្រូវបានពលរដ្ឋដឹកចាក់ចោលដោយសារប្រមូលផលបានគ្មានទីផ្សារលក់ ឬលក់បានតម្លៃថោកពេក។
តាមការចុះផ្សាយរបស់អគ្គស្នងការនគរបាលជាតិបានឲ្យដឹងថាភោគផលផ្លែត្រសក់របស់លរដ្ឋដែលរស់នៅលើទីទួលប្រាសាទក្នុងភូមិសាស្ត្រឃុំអូរតាគី ស្រុកថ្មគោល ខេត្តបាត់ដំបង ត្រូវបានប្រជាពលរដ្ឋដឹកយកទៅចាក់ចោលដូចសម្រាមទាំងឡានៗបន្ទាប់ពី ពួកគាត់ខំប្រឹងដាំដុះអស់រយៈពេលរាប់ខែ តែពេលប្រមូលផល គ្មានទីផ្សារគ្មានអ្នកទិញ។
ការចុះផ្សាយដដែលបន្តថាប្រជាពលរដ្ឋនៅទីនោះពឹងផ្អែកលើមុខរបរដាំដំណាំទៅតាមរដូវ ហើយ សព្វថ្ងៃក្រៅពីមុខរបរធ្វើស្រែ គឺពួកគាត់តែងតែនាំគ្នាដាំដំណាំផ្សេងៗ ទៅតាមរដូវ ដូចជា ខាត់ណា ម្រះ និង ត្រសក់ជាដើមដើម្បីទប់ទល់ក្នុងជីវភាពប្រចាំថ្ងៃ ។
ការចុះផ្សាយដដែលបន្តថាដោយឡែកនៅឆ្នាំនេះប្រជាកសិករ ដែលនៅលើទួលប្រាសាទ ភាគច្រើនបានប្រកបមុខរបរដាំដំណាំត្រសក់ដែលធ្វើអោយដំណាំនេះមានការ ធ្លាក់ចុះយ៉ាងខ្លាំងស្ទើរតែគ្មានទីផ្សារ ដោយសារតែការប្រមូលផលមានគ្រប់ទីកន្លែង ហើយព្រមៗគ្នា ដូច្នេះទើបធ្វើអោយផ្លែត្រសក់គ្មានតម្លៃ ។
ការចុះផ្សាយដដែលបន្តថានៅលើទីផ្សារត្រសក់អាចចុះរហូតដល់៣០០ រៀល ក្នុង១គីឡូក្រាម ហើយក្នុងតម្លៃនេះស្ទើរតែរកអ្នកទិញមិនមាន ព្រោះងាកទៅខាងណាក៏ឃើញត្រសក់ដែរ វាច្រើនពេក ដូច្នេះទើបតម្រូវអោយអ្នកខ្លះសម្រេចចិត្តដឹកយកទៅចាក់ចោល ដោយសារតែគ្មានទីផ្សារ៕