នៅថ្ងៃទី០៩ មករា ឆ្នាំ២០១៨ នាទីស្តីការក្រសួងសេដ្ឋកិច្ច និងហិរញ្ញវត្ថុ ឯកឧត្តម អូន ព័ន្ឋមុនីរ័ត្ន ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោក Samiuela T. Tukuafu នាយកស្ថានតំណាងធនាគារអភិវឌ្ឍន៍អាស៊ីប្រចាំកម្ពុជា (ADB) បានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការសម្រាប់គម្រោងចំនួន ០៣ ដែលមានទឹកប្រាក់សរុបប្រមាណ ១៨០លានដុល្លារអាមេរិក រួមមាន ទី១.គម្រោងកែលម្អបណ្តាញផ្លូវជាតិ, ទី២.គម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចនៅតំបន់ទន្លេសាប (ហិរញ្ញប្បទានបន្ថែម), និងទី៣.គម្រោងផ្គត់ផ្គង់ទឹកស្អាត និងអនាម័យតាមខេត្ត។
១-គម្រោងកែលម្អបណ្តាញផ្លូវជាតិ គ្រោងចំណាយថវិកាសរុបចំនួនប្រមាណ ៧៦,៩៤លានដុល្លារអាមេរិកសម្រាប់កែលម្អកំណាត់ផ្លូវជាតិលេខ១ និងលេខ៦ ប្រវែងប្រមាណ ១៤៧គ.ម ក្នុងគោលដៅចូលរួមសម្រេច គោលនយោបាយអភិវឌ្ឍន៍វិស័យហេដ្ឋារចនាសម្ព័ន្ធគមនាគមន៍ដឹកជញ្ជូន ដើម្បីបង្កើនប្រសិទ្ធភាពដឹកជញ្ជូន និងទ្រទ្រង់ចីរភាពនៃកំណើនសេដ្ឋកិច្ចរយៈពេលវែង។
២-គម្រោងផ្គត់ផ្គង់ទឹកស្អាត និងអនាម័យតាមខេត្ត គ្រោងចំណាយថវិកាសរុបប្រមាណ ១១៩លានដុល្លារអាមេរិក ក្នុងនោះ មានហិរញ្ញប្បទានឥតសំណងរបស់រដ្ឋាភិបាលជប៉ុនចំនួន ១០លានដុល្លារអាមេរិក (មូលនិធិជប៉ុនសម្រាប់យន្តការផ្តល់ឥណទានរួមគ្នា) សម្រាប់បង្កើនការផ្តល់សេវាកម្មទឹកស្អាត និងអនាម័យជូនប្រជាពលរដ្ឋដែលរស់នៅតាមទីប្រជុំជន និងក្រុង នៅក្នុងខេត្តបាត់ដំបង, កំពង់ចាម, ព្រះសីហនុ និងសៀមរាប ដើម្បីចូលរួមសម្រេច យុទ្ធសាស្ត្រជាតិស្តីពីវិស័យផ្គត់ផ្គង់ទឹកស្អាត និងអនាម័យជនបទឆ្នាំ២០១៤-២០២៥ ។
៣-គម្រោងកាត់បន្ថយភាពក្រីក្រ និងអភិវឌ្ឍន៍កសិកម្មខ្នាតតូចនៅតំបន់ទន្លេសាប (ហិរញ្ញប្បទានបន្ថែម) គ្រោងចំណាយថវិកាសរុបចំនួនប្រមាណ ៦៦លានដុល្លារអាមេរិក សម្រាប់កែលម្អលក្ខខណ្ខសេដ្ឋកិច្ច-សង្គម និងការរស់នៅរបស់កសិករខ្នាតតូចចំនួន ៦៥ម៉ឺនគ្រួសារ ក្នុងឃុំគោលដៅចំនួន ២៧១ នៃខេត្តចំនួន ៧ ជុំវិញបឹងទន្លេសាប ដើម្បីចូលរួមអភិវឌ្ឍន៍សេដ្ឋកិច្ចជនបទ។ បន្ថែមទៅនឹងគោលដៅខាងលើគម្រោងទាំង៣នេះ សុទ្ធតែមានគោលដៅរួម គឺការកាត់បន្ថយភាពក្រីក្រនិង លើកកម្ពស់ជីវភាពរបស់ប្រជាជនទាំងនៅទីប្រជុំជន និងទាំងនៅជនបទ។
សូមបញ្ជាក់ថា កិច្ចសហប្រតិបត្តិការ ADB បានផ្តល់ហិរញ្ញប្បទានសហប្រតិបត្តិការសរុបចំនួនប្រមាណ ២,៧៥ប៊ីលានដុល្លារអាមេរិក ដោយគិតបញ្ចូលទាំងគម្រោងទាំង០៣ ដែលបានចុះហត្ថលេខក្នុងថ្ងៃនេះ សម្រាប់កម្មវិធី និងគម្រោងអភិវឌ្ឍន៍ ព្រមទាំងជំនួយបច្ចេកទេសសម្រាប់កសាងសមត្ថភាពស្ថាប័នរាជរដ្ឋាភិបាល ដែលក្នុងនោះឥណទានសម្បទានមានទឹកប្រាក់សរុបចំនួនប្រមាណ ២,២៩៩ប៊ីលានដុល្លារអាមេរិក សម្រាប់អនុវត្តកម្មវិធី/គម្រោងចំនួន៩៨ និងហិរញ្ញប្បទានឥតសំណងមានទឹកប្រាក់សរុបចំនួនប្រមាណ ៤៥៥លានដុល្លារអាមេរិក សម្រាប់អនុវត្តកម្មវិធី/គម្រោងចំនួន៤៩៕