ប្រជាពលរដ្ឋជិត៥០០គ្រួសារក្នុងខេត្តបន្ទាយមានជ័យ ស្នើសុំសម្តេចតេជោ ហ៊ុន សែន ជួយអន្តរាគមន៍រឿងទំនាស់ដីធ្លីដែលត្រូវបានកាត់ចូលតំបន់ការពារបរិស្ថានរដ្ឋ។
តាមការចុះផ្សាយរបស់អគ្គស្នងការនគរបាលជាតិនៅថ្ងៃនេះបានឲ្យដឹងថាដល់ប្រជាពលរដ្ឋ៤១៥គ្រួសារដែលអាស្រ័យផលលើដី១,៨១៥ហិតាបានស្នើសុំសម្ដេចហ៊ុន សែន អន្តរាគមន៍ជួយឲ្យបានអាស្រ័យផលវិញ ខណៈដែលរដ្ឋកាត់ចូលតំបន់ការពារបរិស្ថាននៅស្រុកព្រះនេត្រព្រះ ខេត្តបន្ទាយមានជ័យ។
តាមការចុះផ្សាយដដែលឲ្យដឹងថាប្រជាពលរដ្ឋតំណាងបានប្រាប់ថាផ្ទៃដី ១,៨១៥ហិតានេះកាលពីមុនប្រជាពលរដ្ឋ ២ភូមិមាន ភូមិក្របៅ និងភូមិកំពង់ក្រសាំងក្នុងឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ បានអាស្រ័យផលមានដីមួយចំនួនធំធ្វើស្រែមួយចំនួនតូចធ្វើចំការ។
ការចុះផ្សាយបន្តថាក្រោយមករាជរដ្ឋាភិបាលកម្ពុជាបានកាត់ចូលដីតំបន់ការពារបរិស្ថានជុំវិញបឹងទន្លេសាបមាន២តំបន់ប៉ុនគ្នាមានទំហំ ៥០៥ហិតា និងតំបន់មួយទៀតមានផ្ទៃដី ១,៣១០ហិតា ដែលជាដីប្រជាពលរដ្ឋអាស្រ័យផល។
ការចុះផ្សាយបន្ថែមថាប្រជាពលរដ្ឋសំណូមពរ ដល់ប្រមុខរាជរដ្ឋាភិបាលកម្ពុជា ជួយអន្តរាគមន៍ជួយឲ្យពលរដ្ឋទាំងនោះទទួលបានដីដែលកាត់ចូលតំបន់ការពារបរិស្ថាន បានអាស្រ័យផលវិញ។
តាមការចុះផ្សាយក៏បន្ថែមថាក្នុងកិច្ចប្រជុំរកដំណោះស្រាយជូនប្រជាពលរដ្ឋលោក ហែល តូនី អគ្គលេខាធិការអាជ្ញាធរបឹងទន្លេសាបបានបញ្ជាក់ថាអ្វីដែលជាសូមណូមពរប្រជាពលរដ្ឋដែលត្រូវបានរាជរដ្ឋាភិបាលកម្ពុជាកាត់ដីចូលតំបន់ការពារបរិស្ថានជុំវិញបឹងទន្លេសាបតំបន់៣នោះ គឺលោកនិងយកសំណើរនេះជូនដល់ថ្នាក់លើដើម្បីសម្រេច៕