កីឡាជិះកង់ត្រូវបានរកឃើញថាមិនមានផលប៉ះពាល់អវិជ្ជមានដល់សុខភាពផ្លូវភេទ ឬមុខងារតម្រង់នោមរបស់បុរសទេ តែវាផ្តល់អត្ថប្រយោជន៍ដល់បេះដូងនិងសសៃឈាម។
អ្នកស្រាវជ្រាវបានរកឃើញអត្ថប្រយោជន៍បែបនេះហើយបានធ្វើការប្រៀបធៀបថា អ្នកជិះកង់ អ្នករត់ និងអ្នកហែលទឹក សុទ្ធតែត្រូវបានរកឃើញថាមានសុខភាពផ្លូវភេទ និងសុខភាពតម្រង់នោមដូចគ្នា។
អ្នកដឹកនាំធ្វើការអង្កេតផ្នែកទឹកនោមលោក Benjamin Breyer ពីសាកលវិទ្យាល័យ California បាននិយាយថា “ការជិះកង់ផ្តល់អត្ថប្រយោជន៍ដល់បេះដូងនិងសសៃឈាមអោយមានសុខភាពល្អក្រៃលែង ហើយមានផលប៉ះពាល់ទាបចំពោះគន្លាក់ឆ្អឹង”។
ជាមួយគ្នានោះដែរលទ្ធផលនៃភាពវិជ្ជមានសម្រាប់កីឡាជិៈកង់ក៏ត្រូវបានរកឃើញ តាមរយៈការស្ទង់មតិកម្រងសំនួរដែលវាស់ស្ទង់សុខភាពផ្លូវភេទ និងមុខងារតម្រង់នោមជាមួយអ្នកជិះកង់ចំនួន ២,៧៧៤ នាក់មកពីចក្រភពអង់គ្លេស សហរដ្ឋអាមេរិក អូស្ត្រាលី និង ញូស៊ីលែន រួមជាមួយ អ្នកហែលទឹក ៥៣៩ នាក់ និង អ្នករត់ប្រណាំង ៧៨៩ នាក់ ត្រូវបានធ្វើ។
ប្រសិទ្ធភាពទាំងនោះត្រូវបានគេវាយតម្លៃខ្ពស់ចំពោះអ្នកជិះកង់ដែលមានថាមពលខ្លាំងអ្នកជិះកង់យូជាង ២ឆ្នាំ និងអ្នកជិៈកង់លើសពី ៣ដងក្នុងមួយសប្តាហ៍ ឬអ្នកជិៈដែលមានចំងាយជាមធ្យម ២៥ ម៉ាយ ក្នុងមួយថ្ងៃ ឬអ្នកជិះកង់កម្សាន្តផ្សេងៗទៀត។
ក្រុមអ្នកសិក្សាស្រាវជ្រាវបាននិយាយថា ការរកឃើញនេះហាក់ផ្ទុយជាមួយការសិក្សាពេលមុន ដែលបង្ហាញថាការជិះកង់អាចមានផលប៉ះពាល់អវិជ្ជមានដល់សុខភាពផ្លូវភេទបុរស៕