រដ្ឋាភិបាលកម្ពុជាបានសម្រេចផ្ដល់នូវសេវាសុខាភាពរបបសន្តិសុខសង្គម ដោយឥតគិតថ្លៃដល់គ្រូបង្រៀន និងអតីតគ្រូបង្រៀន ដើម្បីពិនិត្យ និង ព្យាបាលជំងឺនៅតាមមន្ទីរពេទ្យសាធារណៈ និង ឯកជនដែលចុះកិច្ចព្រមព្រៀងជាមួយ ប.ស.ស។
នេះបើយោងតាមលិខិតផ្លូវការមួយចុះថ្ងៃទី ២៣ ខែ មករាម្សិលមិញដែលក្រសួងអប់រំផ្ញើទៅកាន់ប្រធានមន្ទីរអប់រំ រាជធានី ខេត្តដែលមានកម្មវត្ថុលើកឡើងពីការផ្ដល់របបសន្តិសុខសង្គមផ្នែកថែទាំសុខភាពដោយឥតគិតថ្លៃ នៅតាមមូលដ្ឋានសុខាភិបាលសាធារណៈ និង ឯកជនដែលបានចុះកិច្ចព្រមព្រៀងជាមួយ ប.ស.ស ជូនដល់មន្រ្តី សាធារណៈ និង អតីតមន្រ្តីរាជការ។
ក្រសួងអប់រំបានឲ្យដឹងថាចាប់តាំងពីថ្ងៃទី០១ ខែ មករាតទៅគ្រូបង្រៀន និងអតីតគ្រូបង្រៀនទាំងអស់អាចទៅទទួលសេវាថែទាំសុខភាពដោយឥតបង់ថ្លៃ ដោយគ្រាន់តែភ្ជាប់ទៅជាមួយនូវប័ណ្ណសម្គាល់ខ្លួនមន្រ្តីរាជការ និងអត្តសញ្ញាណប័ណ្ណសញ្ជាតិខ្មែររាល់ពេលទៅទទួលសេវា។
ក្រសួងអប់រំបន្តថាសម្រាប់អតីតគ្រូបង្រៀនដែលមានប័ណ្ណសម្គាល់ខ្លួនដែលហួសកាលកំណត់ អាចទៅបញ្ជាក់នៅក្រសួង ឬមន្ទីរអប់រំរាជធានី ខេត្តដែលខ្លួននៅក្រោមឱវាទ។
ជាមួយគ្នានោះដែរក្រសួងអប់រំក៏ជំរុញឲ្យប្រធានអង្គភាពសាមី ត្រូវរួសរាន់ចេញលិខិតបញ្ជាក់ពីអត្តសញ្ញាណ ជូនដល់អតីតមន្រ្តីរាជការ ឬអតីតគ្រូបង្រៀនឲ្យបានទាន់ពេលវេលា៕